ଓଡ଼ି ନେଷ୍ଟ : ଆପଣ ଦେଢ ଭରି ସୁନା କିଣିପାରିବେ, ହେଲେ ଗୋଟେ ସ୍କୋୟାରଫୁଟ ଜାଗା କିଣିପାରିବେନି । ହଁ ଆଜ୍ଞା ଆମ ଦେଶରେ ଏବେ ସୁନାଠୁ ଅମୂଲମୂଲ ହୋଇଯାଇଛି ଜାଗା । କେତେକ ସ୍ଥାନରେ ଏବେ ଜମି ସ୍କୋୟାରଫୁଟକୁ ଲକ୍ଷେ ଟଙ୍କା ହେଲାଣି । କୋଉଠି ଏତେ ଦାମ ପୂରା ଖବରରେ ଜାଣନ୍ତୁ….
ଭୁବନେଶ୍ୱରଠୁ ୧୦ ଗୁଣ ଦାମୀ ହାଇଦ୍ରାବାଦ
ହାଇଦ୍ରାବାଦରେ ସ୍କୋୟାରଫୁଟକୁ ଲକ୍ଷେ
ଖୋଜିଲେ ବି ଜମି ପାଉନାହାନ୍ତି ଲୋକ
ହାଇଦ୍ରାବାଦର ବିଭିନ୍ନ ଅଞ୍ଚଳରେ ଏବେ ଜମି ମରୁଡି ଦେଖାଦେଇଛି । ଅର୍ଥାତ ସେଠାରେ ଲୋକଙ୍କୁ ଜମି ମିଳୁନି । ଅର୍ଥନୀତି ପାଠ ଅନୁସାରେ ଚାହିଦା ଅଧିକ ଆଉ ଦ୍ରବ୍ୟ କମ ଥିଲେ ଦାମ ତ ବଢିବ ହିଁ ବଢିବ । ହାଇଦ୍ରାବାଦରେ ଏବେ ଠିକ ସେମିତି ସ୍ଥିତି ଦେଖାଦେଇଛି । ଜାଗା ଖଣ୍ଡେ କିଣିବାକୁ ଲୋକ ଅପର୍ଯ୍ୟାପ୍ତ ଟଙ୍କା ଦେବାକୁ ପଛାଉନାହାନ୍ତି । ଯାହାଫଳରେ ଜମି ଦାମ ସ୍କୋୟାରଫୁଟକୁ ଲକ୍ଷେ ଟଙ୍କା ଛୁଇଁଛି ।
କୋଉଠି ସ୍କୋୟାରଫୁଟକୁ ଲକ୍ଷେ:
ହାଇଦ୍ରାବାଦର ବନଜାରା ହିଲ୍ସ ଏବଂ ଗାଚିବୋଭଲି ପରି ଅଞ୍ଚଳରେ ଜମି ପାଇଁ ଅଧିକ ମୂଲ୍ୟ ଦେବାକୁ ପଡୁଛି । ଆଶାଠାରୁ ଅଧିକ ମୂଲ୍ୟ ବଢି ସ୍କୋୟାରଫୁଟ ପ୍ରତି ଲକ୍ଷେ ଟଙ୍କାରେ ପହଞ୍ଚିଲାଣି । ଜାଗା ନଥିବାରୁ ଲୋକ ପୂରୁଣା ଘରକୁ ଭାଙ୍ଗି ନୂଆ ନିର୍ମାଣ କରୁଛନ୍ତି । ଏଣୁ ଯେଉଁ ସ୍ବଳ୍ପ ପରିମାଣର ଜମି ରହିଛି ତାହାକୁ ହାଇଦ୍ରାବାଦ ଏବଂ ରାଜ୍ୟ ବାହାରର ବିଲଡରମାନେ ହଜାର ହଜାର କୋଟି ଟଙ୍କା ଦେଇ କିଣିନେଉଛନ୍ତି । ଫଳରେ ଜମିର ଦାମ ଆକାଶ ଛୁଆଁ ହୋଇଯାଇଛି ।
ଭୁବନେଶ୍ୱରଠୁ ୧୦ ପାଦ ଆଗରେ ହାଇଦ୍ରାବାଦ:
ଆମ ଭୁବନେଶ୍ୱର କଥା ଚିନ୍ତା କଲେ ଏଠି ବି ଜମିର ଦାମ ବଢିବାରେ ଲାଗିଛି । ପଟିଆ ଅଞ୍ଚଳରେ ଜମି ସାଧାରଣତଃ ସ୍କୋୟାରଫୁଟ ପ୍ରତି ୫ରୁ୮ ହଜାର ଟଙ୍କା ରହିଛି । ନୟାପଲ୍ଲୀ ଅଞ୍ଚଳରେ ସର୍ବନିମ୍ନ ସ୍କୋୟାରଫୁଟ ପ୍ରତି ଦାମ ରହିଛି ୧୦ ହଜାର ଟଙ୍କା । ଏହାକୁ ହିସାବକୁ ନେଲେ ହାଇଦ୍ରାବାଦ ଜମି ଭୁବନେଶ୍ୱର ଜମିଠାରୁ ୧୦ ଗୁଣା ଅଧିକ । ଅର୍ଥାତ ଆପଣ ଭୁବନେଶ୍ୱରରେ କୋଟିଏ ଟଙ୍କାରେ କିଣୁଥିବା ଜମିଟି ହାଇଦ୍ରାବାଦରେ ୧୦ କୋଟି ଟଙ୍କା ପଡିବ ।
ଜମି ଦାମ ଏତେ ବଢୁଛି କାହିଁକି:
ପ୍ରାୟ ସବୁ ଜାଗାରେ ଲୋକ ଏବେ ସହରମୁହାଁ ହେଲେଣି । ଜନବସତି ବଢିବା ସହ ଜମିର ଆବଶ୍ୟକତା ବଢୁଛି । ଲୋକ ଘର କିଣିବାକୁ ସହରରେ ଭଲ ଜମି ଖଣ୍ଡେ କିଣୁଛନ୍ତି । ଚାହିଦା ଅଧିକ ହେଉଥିବାରୁ ସେହି ଅନୁପାତରେ ଜମିର ମୂଲ୍ୟ ମଧ୍ୟ ବଢୁଛି । ଜନସଂଖ୍ୟା ବୃଦ୍ଧି ହେଲେ ବି ଜମି ସୀମିତ । ଏଣୁ ସୀମିତ ଜମି ପାଇଁ ପ୍ରତିଯୋଗିତା ଅଧିକ ହେଉଥିବାରୁ ଲୋକ ଅଧିକ ଟଙ୍କା ଦେବାକୁ ବି ପଛାଉନାହାନ୍ତି । ଆମ ଭୁବନେଶ୍ବରରେ ୨୦ ବର୍ଷ ତଳେ ଯେଉଁ ଜମିଦାମ ୩୦ ହଜାର ଟଙ୍କା ଥିଲା ତାହା ଆଜି ୩ କୋଟିରେ ପହଞ୍ଚିଛି । ହାଇଦ୍ରାବାଦ ଭଳି ସିଟିରେ ରହିବାକୁ ଅଧିକ ଚାହିଦା ରହିଥିବାରୁ ସେଠାରେ ଜମିର ମୂଲ୍ୟ ଭୁବନେଶ୍ୱରଠାରୁ ୧୦ ଗୁଣ ଅଧିକ ରହିଛି ।
ଆପଣ ଜମି କିଣିବେ କି ?
ଆପଣ ଯଦି ଜମି ମାଲିକ ହେବାକୁ ସ୍ବପ୍ନ ଦେଖୁଛନ୍ତି ଏବଂ ସହରରେ ଜମି କିଣିବାକୁ ଭାବୁଛନ୍ତି ତେବେ ନିଶ୍ଚିତ ଜମି କିଣନ୍ତୁ । ବର୍ତ୍ତମାନ ସମୟରେ ସୁଧ କାରବାରଠୁ ଅଧିକ ରିଟର୍ଣ୍ଣ ଦେଉଛି ଜମି । ଗୋଟିଏ ଜମି କିଣି ତାକୁ କିଛି ବର୍ଷ ପକାଇଦେଲେ ଆପଣଙ୍କ ଟଙ୍କା ଡବଲ ହୋଇଯିବାର ବି ଉଦାହରଣ ରହିଛି । ଏଣୁ ଭଲ ଜମିରେ ନିବେଶ କଲେ ତାହା ଆପଣଙ୍କୁ ଭବିଷ୍ୟତ ପାଇଁ ସହାୟକ ହୋଇପାରେ । ତେବେ ଏତେ ଟଙ୍କା କୋଉଠୁ ଆଣିବେ ସେକଥା ବି ଆପଣଙ୍କ ମନରେ ପ୍ରଶ୍ନ ଉଠୁଥିବ । ତାହାର ସମାଧାନ ବି ଏମିତି କିଛି ହୋଇପାରିବ-
ଜାଗା କିଣିବାକୁ ବ୍ୟାଙ୍କ ପ୍ଲଟ ଲୋନ ଦେଉଛି
ଫାଇନାନ୍ସ କମ୍ପାନୀ ବି ଜମି ଲୋନ୍ ଦେଉଛନ୍ତି
ଇଏମଆଇ ଦ୍ବାରା ଆପଣ ଜମି କିଣିପାରିବେ
ଜାଗାକୁ ଆପଣ ଭଡା ଦେଇ ଇଏମଆଇ ଉଠାଇପାରିବେ
