ଓଡ଼ି ନେଷ୍ଟ : ସକାଳୁ ଉଠିଲେ କିଏ ବା ମହାପ୍ରଭୁଙ୍କୁ ଦର୍ଶନ କରିବାକୁ ନ ଚାହିଁବ ? ସଞ୍ଜରେ ସମୁଦ୍ର କୂଳେ ଘରାଏ ବୁଲି ନ ଆସିବାକୁ କାହାର ବା ମନ ନ ହେବ ? ଶ୍ରୀକ୍ଷେତ୍ରରେ କିଏ ବା ନ ରହିବାକୁ ଚାହିଁବ ? ପୁରୀ… ସମସ୍ତଙ୍କର ଗୋଟେ ଆକର୍ଷଣ । ଏବେ ଏହି ଆକର୍ଷଣର କ୍ଷେତ୍ର ଉପରେ ରହିଛି ସାରା ଦେଶର ନଜର । ସର୍ଭେରୁ ଜଣାପଡିଛି , ଦେଶର ଯେଉଁ ୧୭ଟି ସହର ଦ୍ରୁତ ଗତିରେ ବିକାଶ କରୁଛି ଏବଂ ରିୟଲ ଇଷ୍ଟେଟ କାରବାରର ନୂଆ ଠିକଣା ସାଜିଛି । ତା ଭିତରେ ପୁରୀ ହେଉଛି ଅଧିକ ପସନ୍ଦ ।
ପୁରୀରେ ଆଗକୁ ନମିଳିପାରେ ଜମି
ଦେଶର ନଜରରେ ପୁରୀ ସହର
ଜାଗା ପାଇଁ ବଡବଡିଆଙ୍କ ପ୍ରତିଯୋଗିତା
ଚମକାଇ ଦେଇଛି ସର୍ଭେ:
ଆମ ଭାରତୀୟ ମାନେ ପର୍ଯ୍ୟଟନ ଓ ଆଧ୍ୟାତ୍ମିକ କ୍ଷେତ୍ରରେ ବସବାସ କରିବାକୁ ଭାରି ଭଲପାଆନ୍ତି । ଲୋକଙ୍କ ପସନ୍ଦର କ୍ଷେତ୍ର ଜାଣିବାକୁ କଲିଅର୍ସ ନାମକ ଏକ ସଂସ୍ଥା ଏହା ଉପରେ ସର୍ଭେ କରିଥିଲା । ଦେଶରେ ଦ୍ରୁତ ଅଭିବୃଦ୍ଧି କରୁଥିବା ୧୦୦ଟି ସହରକୁ ବିଚାରକୁ ନିଆଯାଇଥିଲା । ଯେଉଁଥିରୁ ୩୦ଟି ସହରକୁ ସର୍ଟଲିଷ୍ଟେଡ କରାଯିବା ପରେ ଜଣାପଡିଥିଲା ଯେ, ସେଥିରୁ ୧୭ଟି ସହର ଆଗାମୀ କିଛି ବର୍ଷରେ ରିୟଲ ଇଷ୍ଟେଟର ହଟସ୍ପଟ ପାଲଟିବାକୁ ଯାଉଛି । ଯେଉଁଥିରେ ରହିଛି ଟେମ୍ପଲ ସିଟି ବାରଣାସୀ, ଅଯୋଧ୍ୟା, ପୁରୀ, ଦ୍ୱାରକା, ସିରିଡି, ତିରୁପତି ଓ ଅମୃତସର । ଏହି ସହର ଗୁଡିକରେ ଜମିର ଦାମ କମ ଦିନରେ ଦୁଇଗୁଣ ହେଇଯାଉଛି ।
ପୁରୀ କାହିଁକି ପସନ୍ଦ:
ଜଗନ୍ନାଥ ମନ୍ଦିର
ସମୁଦ୍ର
ଶାନ୍ତ ଓ ଆଧ୍ୟାତ୍ମିକ ପରିବେଶ
ମହାପ୍ରଭୁ ଶ୍ରୀଜଗନ୍ନାଥ ହେଉଛନ୍ତି ଓଡିଶା ଓ ପୁରୀର ପରିଚୟ । ଶ୍ରୀକ୍ଷେତ୍ରର ଆଧ୍ୟାତ୍ମିକ ପରିବେଶ ପ୍ରତି ମଣିଷକୁ ଶାନ୍ତି ଓ ତୃପ୍ତି ଦେଇଥାଏ । ୧୨ ମାସରେ ତେର ପର୍ବ ସହ ବିଶ୍ୱପ୍ରସିଦ୍ଧ ରଥଯାତ୍ରା ଲୋକଙ୍କୁ ପୁରୀକୁ ଆକର୍ଷିତ କରିଥାଏ । ଖାସ ମହାପ୍ରଭୁଙ୍କ ପାଇଁ ହିଁ ପୁରୀରେ ସମସ୍ତେ ରହିବାକୁ ପସନ୍ଦ କରିଥାନ୍ତି । ଏହାସହ ପୁରୀ ପାଖରେ ବିଶ୍ୱ ଐତିହ୍ୟ ଚନ୍ଦ୍ରଭାଗା, କୋଣାର୍କ, ସାତପଡା, ଚିଲିକା ଆଦି ଅନେକ କ୍ଷେତ୍ର ରହିଛି ଯାହାକି ଲୋକଙ୍କୁ ଆକର୍ଷିତ କରୁଛି ।
ଶ୍ରୀକ୍ଷେତ୍ରରେ ରହିବାର ଫାଇଦା:
ସକାଳୁ ଉଠିଲେ ମହାପ୍ରଭୁଙ୍କ ନୀଳଚକ୍ରର ଦର୍ଶନ । ଜୟଜଗନ୍ନାଥ ଧ୍ୱନୀରୁ ଦିନର ଶୁଭାରମ୍ଭ । ମହାପ୍ରଭୁଙ୍କୁ ଦର୍ଶନ କରି ଅପାର କରୁଣା ଲାଭ । ମହୋଦଧିରେ ସ୍ନାନର ସୁଯୋଗ ସହ ସମୁଦ୍ରର ମନଲୋଭା ସୌନ୍ଦର୍ଯ୍ୟକୁ ଉପଭୋଗ କରିବା ପୁରୀରେ ରହିବାର ସର୍ବଶ୍ରେଷ୍ଠ ଫାଇଦା । ପୁରୀ ହେଉଛି ଗୋଟିଏ ଶାନ୍ତିର ସହର । ଶଙ୍ଖ ଧ୍ୱନୀ ସାଙ୍ଗକୁ ଜଗନ୍ନାଥ ସଂସ୍କୃତି ସହ ଜଡିତ ହେବାକୁ ପୁରୀରେ ରହିବାକୁ ଲୋକ ଅଧିକ ପସନ୍ଦ କରନ୍ତି ।
ପୁରୀରେ ଆପଣ କାହିଁକି କିଣିବେ ଜମି:
ଶ୍ରୀମନ୍ଦିର ପରିକ୍ରମା ପ୍ରକଳ୍ପ:
ଶ୍ରୀମନ୍ଦିର ପରିକ୍ରମା ପ୍ରକଳ୍ପ ପୁରୀକୁ ଆହୁରି ବିଶ୍ୱପ୍ରସିଦ୍ଧ କରିଛି । ଶ୍ରୀମନ୍ଦିର ଚାରିପାଖେ ପରିକ୍ରମା ସହ ଏକ ସୁନ୍ଦର ଆଧ୍ୟାତ୍ମିକ ପରିବେଶ ସୃଷ୍ଟି କରିଛି । ଯାହାକି ଭକ୍ତ ଓ ପର୍ଯ୍ୟଟକଙ୍କୁ ପୁରୀକୁ ଆସିବାକୁ ବାଧ୍ୟ କରୁଛି । ଏହି ପ୍ରକଳ୍ପ ଅନ୍ତର୍ଗତ ଶ୍ରୀମାର୍ଗ, ଶ୍ରୀ ସେତୁ ଆଦି ପୁରୀର ବିକାଶରେ ମାଇଲଖୁଣ୍ଟ ସାଜିଛି ।
ଅନ୍ତର୍ଜାତୀୟ ବିମାନବନ୍ଦର:
ପୁରୀରେ ଏକ ଅନ୍ତର୍ଜାତୀୟ ବିମାନବନ୍ଦର ନିର୍ମାଣ ପ୍ରକ୍ରିୟା ଜାରି ରହିଛି । ଦିନକୁ ପୁରୀକୁ ପ୍ରାୟ ୭୦ ହଜାର ପର୍ଯ୍ୟଟକ ଆସିଥାନ୍ତି । ଏହାକୁ ଦୃଷ୍ଟିରେ ରଖି ଏକ ଅନ୍ତର୍ଜାତୀୟ ବିମାନବନ୍ଦର ନିର୍ମାଣ କରାଯାଉଛି । ଫଳରେ ଦେଶବିଦେଶର ଲୋକ ଆଉ ଭୁବନେଶ୍ୱର ନୁହେଁ ଏଣିକି ସିଧା ପୁରୀକୁ ବିମାନରେ ଆସିପାରିବେ ।
ଭୁବନେଶ୍ୱର-ପୁରୀ ୬ ଲେନ ରାସ୍ତା:
ଖୁବଶୀଘ୍ର ଭୁବନେଶ୍ୱର-ପୁରୀ ରାସ୍ତାକୁ ୬ ଲେନ ବିଶିଷ୍ଟ କରାଯିବ । ଏବେ ଏହା ୪ ଲେନ ବିଶିଷ୍ଟ ରହିଛି । ରାସ୍ତାର ସଂପ୍ରସାରଣ ପାଇଁ ରାଜ୍ୟ ସରକାର ନିଷ୍ପତ୍ତି ନେଇସାରିଛନ୍ତି । ୬ ଲେନ ରାସ୍ତା ସହ ୨ ଲେନ ସର୍ଭିସ ରୋଡ ବି ରହିବ ।
ମେଟ୍ରୋ:
ପୁରୀକୁ ଦେଶର ପ୍ରାୟ ସବୁ ସ୍ଥାନକୁ ରେଳ ଯୋଗାଯୋଗ ରହିଛି । ତେବେ ଆଗାମୀ ଦିନରେ ମେଟ୍ରୋ ଗଡିବାର ମଧ୍ୟ ଆଶା ରହିଛି । ରାଜ୍ୟ ସରକାରଙ୍କ ପ୍ରସ୍ତାବିତ ମେଟ୍ରୋ ପ୍ରକଳ୍ପର ଦ୍ୱିତୀୟ ପର୍ଯ୍ୟାୟରେ ପୁରୀକୁ ସଂଯୋଗ କରାଯିବାକୁ ନିଷ୍ପତ୍ତି ହୋଇଛି ।
ଭିତ୍ତିଭୂମିର ବିକାଶ:
ପୁରୀରେ ସବୁ ପ୍ରକାର ଭିତ୍ତିଭୂମି ବିକାଶକୁ ଗୁରୁତ୍ୱ ଦିଆଯାଉଛି । ସହରର ବିକାଶ ପାଇଁ ବ୍ୟାପକ ପଦକ୍ଷେପ ଗ୍ରହଣ କରାଯାଉଛି । ପୁରୀରେ ଏକ ମେଡିକାଲ କଲେଜ ସ୍ଥାପନ ହୋଇଛି । ସମୁଦ୍ର ବେଳାଭୁମିକୁ ଅଧିକ ସୌନ୍ଦର୍ଯ୍ୟକରଣ କରିବାକୁ ପ୍ରୟାସ ଚାଲିଛି । ଏକ ବିଶ୍ୱସ୍ତରୀୟ ସହର ଭାବେ ଶ୍ରୀକ୍ଷେତ୍ରକୁ ଗଢିତୋଳାଯାଉଛି । ଏସବୁ କାରଣ ପାଇଁ ବିଶ୍ୱସ୍ତରରେ ପୁରୀର ଚାହିଦା ବଢିବାରେ ଲାଗିଛି । ପୁରୀରେ ଜମି କିଣିବାକୁ ଲୋକଙ୍କ ଭିତରେ ଏକପ୍ରକାର ପ୍ରତିଯୋଗିତା ଆରମ୍ଭ ହେଇଗଲାଣି।
