# ଅସଂପୂର୍ଣ୍ଣ ଏବଂ ଅଗ୍ନିନିର୍ବାପନ କ୍ଲିୟରାନ୍ସ ସାର୍ଟିଫିକେଟ୍ ବିନା ଫ୍ଲାଟ୍ ପ୍ରଦାନ କରିପାରିବେନି ରିୟଲ ଇଷ୍ଟେଟ୍ ସଂସ୍ଥା
# ନିୟମ ଖିଲାପୀ ପାଇଁ ରିୟଲ ଇଷ୍ଟେଟ୍ ଡେଭଲପରକୁ ୧୫ ଲକ୍ଷ ଟଙ୍କା କ୍ଷତିପୂରଣ ନିର୍ଦ୍ଦେଶ
ଓଡ଼ି ନେଷ୍ଟ : ନିକଟରେ ଆପଣ ଫ୍ଲାଟ୍ ବୁକ୍ କରିଛନ୍ତି କି ? ଏନେଇ ପ୍ଲାନିଂ କରୁଛନ୍ତି କି ? ଯଦି ହଁ ତାହେଲେ ସତର୍କ ହୋଇଯାଆନ୍ତୁ, ଠକେଇରୁ ବର୍ତ୍ତନ୍ତୁ। ପୂରା ଖବର କ’ଣ ଜାଣିବାକୁ ଆଗକୁ ବଢନ୍ତୁ।….
OD NEST ପକ୍ଷରୁ ଏ ବଢିଆ ଖବର କେବଳ ଆପଣଙ୍କ ପାଇଁ। କାରଣ ହୋମ୍ ବାୟର ବା ଗୃହ କ୍ରେତାଙ୍କ ସ୍ବାର୍ଥ ରକ୍ଷା ସପକ୍ଷରେ ସୁପ୍ରିମକୋର୍ଟ ଏକ ବଡ଼ ନିର୍ଦ୍ଦେଶ ଦେଇଛନ୍ତି। ରିୟଲ ଇଷ୍ଟେଟ୍ ଡେଭଲପରମାନେ କ୍ରେତାଙ୍କୁ ଏଣିକି ଆଉ ଅସଂପୂର୍ଣ୍ଣ ଫ୍ଲାଟ କିମ୍ବା ଫାୟାର ଫାଇଟିଂ ବ୍ୟବସ୍ଥାର ବୈଧ ପ୍ରମାଣପତ୍ର ବିନା ଫ୍ଲାଟ୍ ହସ୍ତାନ୍ତର କରିପାରିବେ ନାହିଁ। କ୍ରେତା ବା ଗ୍ରାହକଙ୍କୁ ଆଗ କମ୍ପ୍ଲିସନ୍ ସାର୍ଟିଫିକେଟ୍ ଏବଂ ବୈଧ ଅଗ୍ନିନିର୍ବାପନ ପ୍ରମାଣପତ୍ର ଦିଆଯିବ, ତା ପରେ ଫ୍ଲାଟ୍ ପଜେସନ୍ । ଏଇ ଦୁଇ ସାର୍ଟିଫିକେଟ୍ ବିନା ଫ୍ଲାଟ ହସ୍ତାନ୍ତରକୁ କନ୍ୟୁଜମର ପ୍ରୋଟେକ୍ସନ୍ ଆକ୍ଟ ଅନୁଯାୟୀ ଡେଫିସିଏନ୍ସି ଇନ ସର୍ଭିସ୍ ବା ସେବା ପ୍ରଦାନରେ ଅଭାବକୁ ଦର୍ଶାଯିବ ଏବଂ ଫ୍ଲାଟକୁ ବୈଧ ବୋଲି ବିବେଚନା କରାଯିବ ନାହିଁ।
ଏସଂକ୍ରାନ୍ତ ଏକ ମାମଲାର ବିଚାର କରି ଜଷ୍ଟିସ୍ ବିକ୍ରମ ନାଥ ଏବଂ ପ୍ରସନ୍ନା ଭାଲଚନ୍ଦ୍ର ଭାରାଲେଙ୍କ ଦ୍ବାରା ଗଠିତ ସର୍ବୋଚ୍ଚ ଅଦାଲତଙ୍କ ଖଣ୍ଡପୀଠ ଏହି ବଡ଼ ରାୟ ଦେଇଛନ୍ତି। କେବଳ ସେତିକି ନୁହେଁ ମାମଲାରେ ଆବେଦନାକାରୀଙ୍କୁ ୧୫ ଲକ୍ଷ ଟଙ୍କାର କ୍ଷତିପୂରଣ ଦେବାକୁ ଖିଲାପୀ ଆଗ୍ରା ଡେଭଲପମେଣ୍ଟ ଅଥରିଟି ବା ADAକୁ ନିର୍ଦ୍ଦେଶ ଦେଇଛନ୍ତି।
ସର୍ବୋଚ୍ଚ ଅଦାଲତ ସ୍ପଷ୍ଟ କରିଛନ୍ତି, ଏକ୍ଷେତ୍ରରେ ADA ଉତ୍ତରପ୍ରଦେଶ ଆପାର୍ଟମେଣ୍ଟ ଆକ୍ଟ ଏବଂ RERA ଆକ୍ଟ, ୨୦୧୬ର ସଂପୂର୍ଣ୍ଣ ଉଲ୍ଲଂଘନ କରିଛି। ଯେଉଁଥିରେ ପଜେସନ୍ ବା ମାଲିକାନା ଦେବା ପୂର୍ବରୁ ହୋମ୍ ବାୟାରଙ୍କୁ ଏସବୁ ସାର୍ଟିଫିକେଟ୍ ପ୍ରଦାନକୁ ବାଧ୍ୟତାମୂଳକ କରାଯାଇଛି। ତେଣୁ ଆବଶ୍ୟକ ସମସ୍ତ ପ୍ରମାଣପତ୍ର ବିନା ହସ୍ତାନ୍ତର ହୋଇଥିବା ସଂପତ୍ତି ବେଆଇନ୍ ଏବଂ ଏପରି ସ୍ଥଳରେ ଜଣେ କ୍ରେତାଙ୍କୁ ଫ୍ଲାଟର ମାଲିକାନା ନେବାକୁ ବାଧ୍ୟ କରାଯାଇ ପାରିବନି ବୋଲି କୋର୍ଟ ସ୍ପଷ୍ଟ କରିଛନ୍ତି।
ମାମଲାର ବିବରଣୀ ଅନୁଯାୟୀ, ଧର୍ମେନ୍ଦ୍ର ଶର୍ମା ନାମକ ଜଣେ ବ୍ୟକ୍ତି ଉତ୍ତରପ୍ରଦେଶ ସରକାର ଅଧିନସ୍ଥ ADAରେ ଏକ ଫ୍ଲାଟ୍ ବୁକ୍ କରିଥିଲେ। ହେଲେ ଫ୍ଲାଟ୍ ହସ୍ତାନ୍ତର ବେଳେ ନିୟମ କାନୁନକୁ ଜଳାଞ୍ଜଳି ଦେଇଏ ଏଡିଏ ତାଙ୍କୁ କମ୍ପ୍ଲିସନ୍ ସାର୍ଟିଫିକେଟ୍ ଏବଂ ଫାୟାର ଫାଇଟିଂ କ୍ଲିୟରାନ୍ସ ସାର୍ଟିଫିକେଟ୍ ନ ଦେଇ ସମୟ ଗଡ଼ାଇ ଚାଲିଥିଲା। ଏପରିକି ଏନେଇ ସେ ଗ୍ରାହକ ସେବା ଆୟୋଗର ଦ୍ବାରସ୍ଥ ହୋଇଥିଲେ ମଧ୍ୟ ଏଡିଏ ସାର୍ଟିଫିକେଟ୍ ଦାଖଲରେ ବିଫଳ ରହିଥିଲା। ଫଳରେ ମାମଲା ସୁପ୍ରିମକୋର୍ଟରେ ପହଞ୍ଚିଥିଲା।
ସର୍ବୋଚ୍ଚ ଅଦାଲତଙ୍କ ଏ ରାୟ ନିୟମର ଧଜିଆ ଉଡ଼ାଇ ଗ୍ରାହକଙ୍କୁ ଠକୁଥିବା ଅସାଧୁ ବିଲଡର ଓ ରିୟଲ ଇଷ୍ଟେଟ୍ ଡେଭଲପରଙ୍କ ନିଦ ହଜାଇ ଦେଇଥିଲା ବେଳେ ହୋମ୍ ବାୟରଙ୍କ ସ୍ବାର୍ଥ ସୁରକ୍ଷା ପାଇଁ ବରଦାନ ସାବ୍ୟସ୍ତ ହୋଇଛି।
