ଓଡ଼ି ନେଷ୍ଟ : ଜଣେ ଲୋକର ସବୁଠୁ ବଡ ସ୍ୱପ୍ନ ନିଜର ଘରଟିଏ ତୋଳିବା । ଘରଖଣ୍ଡେ ପାଇବାକୁ ସିଏ କଣ ନକରେ ! ପେଟରୁ କାଟି ଟଙ୍କାଏ ଲେଖାଏ ଜମା କରେ । ଲକ୍ଷାଧିକ ଟଙ୍କା ଲୋନ କରେ । ଜୀବନର ଖର୍ଚ୍ଚ କାଟ କରି ଇଏମଆଇ ଭରେ । ସବୁକିଛି ବାଜିରେ ଲଗାଇଦିଏ । ହେଲେ ବଦଳରେ ତାକୁ ମିଳେ କଣ ? ତା ଘର ସ୍ୱପ୍ନରେ ବିଲଡର ବୁଲଡୋଜର ଚଢେଇଦିଏ । ଫ୍ଲାଟ ଦେବାରେ ଡେରି କରି ହଇରାଣ କରେ । ଏପଟେ ଇଏମଆଇ ବୋଝ ଆଉ ଆରପଟେ ଘର ଭଡାରେ ମଣିଷ ଅଣନିଶ୍ୱାସୀ ହୋଇଯାଏ । ହେଲେ କର୍ଣ୍ଣାଟକରୁ ଏମିତି ଏକ ଖବର ଆସିଛି ଯାହା ଆପଣଙ୍କୁ ଖାଲି ଆଶ୍ୱସ୍ତ କରିବନି ବରଂ ଆପଣଙ୍କ ଘର ସ୍ୱପ୍ନକୁ ନୂଆ ବଳ ଦେବ ।
-ଅମାନିଆ ବିଲଡର ଉପରେ ବାଜିଲା ରେରା ଛାଟ
-ଫ୍ଲାଟ ଦେବାରେ ଡେରି କରି ଫସିଲେ ବିଲଡର
-ପ୍ରମୋଟର ଗଣିବେ ୮୫ ଲକ୍ଷ ଟଙ୍କା ଫାଇନ
ହଁ ଆଜ୍ଞା, ଫ୍ଲାଟ ପଜେସନ ଦେବାରେ ଡେରି କରିବା ଏକ ରିଅଲ ଇଷ୍ଟେଟ ଗ୍ରୁପଙ୍କୁ ମହଙ୍ଗା ପଡିଛି । ଘର କିଣିଥିବା ଦମ୍ପତିଙ୍କୁ ଜୋରିମନା ବାବଦକୁ ପ୍ରମୋଟର ୮୫.୪୭ଲକ୍ଷ ଟଙ୍କା ଦେବାକୁ କର୍ଣ୍ଣାଟକ ରେରା ନିର୍ଦ୍ଦେଶ ଦେଇଛନ୍ତି ।
କଣ ଥିଲା ଅଭିଯୋଗ:
କର୍ଣ୍ଣାଟକର ଶ୍ରୀନିଧି ଏ ମୂରଲି ଏବଂ ତାଙ୍କ ସ୍ତ୍ରୀ ନାପିନା ସାମପଥ ଏକ ଫ୍ଲାଟ ପାଇଁ ୨୦୧୫ରେ ଟଙ୍କା ଦେଇଥିଲେ । ଫ୍ଲାଟର ମୂଲ୍ୟ ୨.୫୯ କୋଟି ଥିବାବେଳେ ଏମାନେ ପ୍ରାୟ ୮୬ ପ୍ରତିଶତ ଅର୍ଥାତ ୨.୨୩ କୋଟି ଟଙ୍କା ଆଡଭାନ୍ସ ଦେଇଥିଲେ । ଏନଭାରମେଣ୍ଟ ବିଲ୍ଡିଂ ସିଷ୍ଟମ ପ୍ରାଇଭେଟ ଲିମିଟେଡ ଓ ପ୍ରଗତି ଗୃପ ସହିତ ଏଗ୍ରିମେଣ୍ଟ କରିଥିଲେ । ୨୦୧୮ ମସିହାରେ ଫ୍ଲାଟ ହସ୍ତାନ୍ତର ପାଇଁ ଏଗ୍ରିମେଣ୍ଟ ହୋଇଥିଲା । ହେଲେ ୨୦୨୪ ଯାଏଁ ବି ପ୍ରମୋଟର ଘର ଦେଇନଥିଲେ । ଫଳରେ ଅଭିଯୋଗକାରୀ ରେରାର ଦ୍ୱାରସ୍ଥ ହୋଇଥିଲେ ।
କେମିତି ଠକିଛି ବିଲଡର:
ବାୟରଙ୍କ ଅଭିଯୋଗ ଅନୁସାରେ, ୨୦୧୮ରେ ସଂସ୍ଥା ସହ ଚୁକ୍ତି ହୋଇଥିଲା । ନର୍ଥ ବେଙ୍ଗାଳୁରୁ ଏରିଆରେ ଆଫଟର ଦି ରେନ ନାଁରେ ପ୍ରୋଜେକ୍ଟ ଆରମ୍ଭ ହୋଇଥିଲା । ମୂଳ ପ୍ଲାନିଂରେ କେବଳ ୮୯ଟି ଆପାର୍ଟମେଣ୍ଟ ହେବାର ଥିଲା । ମାତ୍ର ପରବର୍ତ୍ତୀ ସମୟରେ ଏହାକୁ ସଂଶୋଧନ କରି ୨୪୫ଟି ୟୁନିଟକୁ ବଢାଯାଇଛି । ହେଲେ ଏଯାଏ ମାତ୍ର ୫୫ଟି ଫ୍ଲାଟ ହସ୍ତାନ୍ତର ହୋଇଛି । ତାହା ପୁଣି ୬ ବର୍ଷ ବିଳମ୍ବରେ । ଏହାଛଡା କ୍ଲବ ହାଉସ, ଗାର୍ଡେନ କାମ ସରିନାହିଁ ।
ବାଜିଲା ରେରା ଛାଟ:
ବାୟରଙ୍କୁ ଫ୍ଲାଟ ପଜେସନ ଦେବାରେ ଅହେତୁଳ ବିଳମ୍ବ ଦର୍ଶାଇ ଅଭିଯୋଗକାରୀ ରେରାର ଆଶ୍ରୟ ହୋଇଥିଲେ । କର୍ଣ୍ଣାଟକ ରେରା ମାମଲାର ବିଚାର କରି ସଂପୃକ୍ତ ସଂସ୍ଥାକୁ ଫାଇନ ପକାଇଛନ୍ତି ।
କେବଳ ଏଇ ଗୋଟିଏ ଘଟଣା ନୁହେଁ । ଦେଶରେ ଏଭଳି ଅନେକ ମାମଲାରେ ରେରା ବିଲଡରଙ୍କୁ ଜୋରିମନା ପକାଇଛନ୍ତି ।
ଆପଣ ବି ମାଗିପାରିବେ ଡିଲେ କମ୍ପେନସେସନ:
ଯଦି ଆପଣ ଫ୍ଲାଟ ବୁକ କରିଛନ୍ତି ଏବଂ ବିଲଡର ଏଗ୍ରିମେଣ୍ଟ ଦିନ ଗଡିବା ପରେ ବି ଘର ଦେଉନି ତେବେ ଆପଣ ବି ରେରାରେ ଅଭିଯୋଗ କରିପାରିବେ । କନସ୍ୟୁମର କୋର୍ଟରେ ବି ମାମଲା ଦାୟର କରିହେବ ।
କଣ କହୁଛି ରେରା ଆଇନ:
ରେରା ସେକ୍ସନ ୧୮ ଅନୁସାରେ, ଯଦି ପଜେସନ ଏଗ୍ରିମେଣ୍ଟ ଡେଟ ପରେ ବି ବିଲଡର ଘର ଦେଉନାହିଁ ତେବେ ଆପଣ ଆଇନର ଆଶ୍ରୟ ନେଇପାରିବେ । ଏହି କ୍ଷେତ୍ରରେ ଦେଇଥିବା ଡିପୋଜିଟ ଫେରାଇ ଆଣିପାରିବେ । କିମ୍ବା ଇଏମଆଇ ଓ ଘରଭଡା ବାବଦକୁ ଇଣ୍ଟ୍ରେଷ୍ଟ ଦାବି କରିବେ ।
କଣ ମିଳିବ କମ୍ପେନସେସନ:
ପଜେସନ ଡିଲେ ପରେ ଯଦି ସେହି ପ୍ରୋଜେକ୍ଟ ଛାଡିବାକୁ ଚାହିଁବେ ତେବେ ଡିପୋଜିଟ ରିଟର୍ଣ୍ଣ ଆଣିପାରିବେ । ଏ କ୍ଷେତ୍ରରେ ପ୍ରମୋଟର ଆପଣଙ୍କୁ ଡିପୋଜିଟ ରିଟର୍ଣ୍ଣ ସହ ତା ଉପରେ ଡିଲେ ଡେଟଠାରୁ ମାସିକ ସୁଧ ପ୍ରଦାନ କରିବ । ଏହା ପ୍ରାୟ ୯ରୁ ୧୦ ପ୍ରତିଶତ ହୋଇଥାଏ । ଯଦି ଆପଣ ଭରୁଥିବା ଇଏମଆଇ ଏବଂ ଭଡାରେ ରହୁଥିବା ଖର୍ଚ୍ଚ ପାଇଁ ବି କ୍ଷତିପୂରଣ ଦାବି କରିବେ ତେବେ ଫ୍ଲାଟ ପଜେସନ ସହ ଆପଣଙ୍କୁ କମ୍ପେନସେସନ ମଧ୍ୟ ମିଳିବ । ତେବେ ଆପଣ କୌଣସି ଫ୍ଲାଟ ପାଇଁ ଏଗ୍ରିମେଣ୍ଟ କରିବା ପୂର୍ବରୁ ସେଥିରେ ଥିବା କଣ୍ଡିସନ ଓ ନିୟମକୁ ଭଲଭାବେ ବୁଝିବା ଜରୁରୀ ଅଟେ ।
