ଓଡ଼ି ନେଷ୍ଟ : ଆଜି ପବିତ୍ର ଶ୍ରୀଗଣେଶ ଚତୁର୍ଥୀ । ଅଗ୍ରପୂଜ୍ୟଙ୍କୁ ସ୍ମରଣ କରି କୌଣସି କାମ ଆରମ୍ଭ କଲେ ବାଧା ସୃଷ୍ଟି ହୁଏ ନାହିଁ । ଗାଁ ଗଣ୍ଡା, ସହର ବଜାର ସବୁଠି ଧୂମଧାମରେ ପାଳିତ ହେଉଛି ଗଣେଶ ପୂଜା । ଘରେ ଘରେ ମଧ୍ୟ ଉତ୍ସବର ମାହୋଲ । ବିଘ୍ନନାଶକଙ୍କୁ ଛୋଟରୁ ବଡ ସଭିଏଁ କରୁଛନ୍ତି ଆରଧନା । ତେବେ ଆପଣଙ୍କ ଘରେ ଶ୍ରୀଗଣେଶଙ୍କ ମୂର୍ତ୍ତି ସଠିକ ସ୍ଥାନରେ ଅଛି ତ? ତାହା ଜାଣିବା ନିହାତି ଜରୁରୀ । ପବିତ୍ର ଗଣେଶ ପୂଜାରେ ଆପଣଙ୍କ ଘରକୁ ସୁଖଶାନ୍ତିର ଆଗମନ ଆଶା କରିବା ସହ ଓଡି ନେଷ୍ଟ ଦେଉଛି ସଫଳ ଜୀବନର କିଛି ଗୁରୁତ୍ୱପୂର୍ଣ୍ଣ ମନ୍ତ୍ର ।
ଅଗ୍ରପୂଜ୍ୟ ପ୍ରଭୁ ଗଜାନନ । ଘରର ପୁନାଦିଠୁ ପ୍ରତି ପୂଜାରେ ସବୁଥିରେ ଆଗ ଲୋଡାପଡନ୍ତି ପ୍ରଭୁ ଶ୍ରୀ ଗଣେଶ । ନାଲି ସିନ୍ଦୁରରେ ଶୁଭ ଲାଭଠୁ ହୋମ ପର୍ଯ୍ୟନ୍ତ ପ୍ରଥମେ ଗଣେଶଙ୍କୁ ହିଁ ପୂଜା କରାଯାଏ । ହେଲେ..
- ଘରେ ବାସ୍ତୁ ଶାସ୍ତ୍ର ଠିକ ଅଛି ତ ?
- ଆପଣଙ୍କ ଘର ପ୍ରତି ଗଣେଶଙ୍କର ଅଛି ତ ଶୁଭ ଦୃଷ୍ଟି ?
ଆମ ଘରେ, ଆପଣଙ୍କ ଘରେ, ଦୋକାନବଜାରରେ, ଶିକ୍ଷାନୁଷ୍ଠାନରେ ଶ୍ରୀଗଣେଶ ପୂଜା ପାଉଛନ୍ତି । ହେଲେ ଠିକ୍ ସ୍ଥାନରେ ଗଣେଶଙ୍କୁ ରଖାଯାଇଛି ତ ? ଗଣେଶ ମୂର୍ତ୍ତିର ଗଢଣ ଠିକ ଅଛି ତ ? କେଉଁ ଦିଗକୁ ରହିଛି ଗଣେଶଙ୍କର ଶୁଣ୍ଢ ? ଗୋଟିଏ ଘରର ସୁଖଶାନ୍ତି ଓ ସମୃଦ୍ଧି ପାଇଁ ଏସବୁ ଦିଗ ବେଶ୍ ଗୁରୁତ୍ୱପୂର୍ଣ୍ଣ । ଏହି ଛୋଟ ଛୋଟ କଥାକୁ ଟିକେ ଅବହେଳା କରିବା ଉଚିତ୍ ନୁହେଁ । ପଢନ୍ତୁ, ପ୍ରଭୁ ଗଣେଶଙ୍କୁ ନେଇ କଣ ରହିଛି ବାସ୍ତୁ…
କେଉଁଠି ରହିବା ଦରକାର ଗଣେଶଙ୍କ ମୂର୍ତ୍ତି :
ଶାସ୍ତ୍ର ଅନୁସାରେ ଗଣେଶଙ୍କ ସମ୍ମୁଖଭାଗ ସବୁବେଳେ ଶୁଭ ହୋଇଥାଏ । ଏଣୁ ଯେଉଁ ପାଖକୁ ତାଙ୍କ ଦୃଷ୍ଟି ରହେ ସେହି ପଟକୁ ହିଁ ଶୁଭଦୃଷ୍ଟି ରହିଥାଏ । ଯଦି ଆପଣ ଘର ବାହାରେ ଗଣେଶଙ୍କ ମୂର୍ତ୍ତି ରଖୁଛନ୍ତି ତେବେ ତାହା ଘର ଭିତର ପାଖ ମୁହାଁ କରି ରଖିବା ଉଚିତ । କାରଣ ଘର ଭିତରକୁ ମୁହଁ କଲେ ହିଁ ଗଣେଶଙ୍କର କୃପା ଘର ପ୍ରତି ରହିବ ।
କେତେ ବଡ ମୂର୍ତ୍ତି ରଖିବେ:
ଠାକୁର ଘରେ ଗଣେଶଙ୍କର ମୂର୍ତ୍ତି ରଖିଲେ ତାହା ୯ ଇଞ୍ଚରୁ କମ କରନ୍ତୁ । ଯଦି ବଡ ମୂର୍ତ୍ତି ପୂଜା କରୁଛନ୍ତି ତେବେ ପ୍ରତିଦିନ ଆପଣଙ୍କୁ ଅନ୍ନ ଭୋଗ କରିବାକୁ ପଡିବ । ନଚେତ ଘର ପ୍ରତି କୋପ ଦୃଷ୍ଟି ପଡିପାରେ ।
ଗଣେଶଙ୍କର ଶୁଣ୍ଢ କେମିତି ହେବା ଦରକାର:
ଶ୍ରୀଗଣେଶଙ୍କ ମୂର୍ତ୍ତି କିଣିବା ବେଳେ ଆପଣ ବେଶ୍ ସତର୍କ ରହିବା ଜରୁରୀ । ମୂର୍ତ୍ତି କିଣିବାବେଳେ ଶୁଣ୍ଢ ପ୍ରତି ବି ଆପଣ ସାବଧାନ ରହିବେ । ଗୃହ ପାଇଁ ଦକ୍ଷିଣାବର୍ତ୍ତୀ ଶୁଣ୍ଢ ଥିବା ଗଣେଶ ଶୁଭଦାୟକ । ଏହା ସଫଳତାର ପ୍ରତୀକ ଅଟେ । ତେଣୁ ସୁନ୍ଦର ପ୍ରତିମା ଖୋଜିବାବେଳେ ଶୁଣ୍ଢ ପ୍ରତି ବି ଧ୍ୟାନ ଦେବା ଆବଶ୍ୟକ ।
ଗଣେଶ ମୂର୍ତ୍ତିର ରଙ୍ଗ କଣ ହେବା ଦରକାର:
କେବଳ ସୁନ୍ଦର ଓ ଚିକଣିଆ ଗଣେଶ ପ୍ରତିମୂର୍ତ୍ତି କିଣିଦେଲେ ହେବନାହିଁ । ଘରର ମଙ୍ଗଳ ପାଇଁ ରଙ୍ଗ ଉପରେ ବି ଦୃଷ୍ଟି ଦେବାକୁ ପଡିବ । ବିଶେଷ କରି ଧବଳ ଓ ସିନ୍ଦୂର ରଙ୍ଗର ଗଣେଶ ଶୁଭଫଳ ପ୍ରଦାନ କରିଥାନ୍ତି । ନୂଆ ଆରମ୍ଭ ସହ ଶାନ୍ତିର ଜୀବନ ପାଇଁ ସହାୟକ ହୋଇଥାନ୍ତି ।
କେମିତି ଦୂର ହେବ ଗ୍ରହକଷ୍ଟ:
ପ୍ରଭୁ ଗଣେଶ ଶୁଭର ପ୍ରତୀକ । ଘରର ଦ୍ୱାରରେ ଗଣେଶଙ୍କର ପ୍ରତୀକ ଭାବେ କଳସ ସ୍ଥାପନ କଲେ ଶୁଭ ଫଳ ପ୍ରାପ୍ତି ହୋଇଥାଏ । ଯଦି ଗ୍ରହ କଷ୍ଟ ରହିଛି ତେବେ ଗଣେଶଙ୍କୁ ସଜ୍ଜିତ କରି ଜଳାଶାୟ କରିବା ଦ୍ୱାରା ମନସ୍କାମନା ପୂର୍ଣ୍ଣ ହୋଇଥାଏ ।
ଛୋଟ ଦିଗ ପ୍ରତି ଧ୍ୟାନ ଦିଅନ୍ତୁ:
ଆମେ ସମସ୍ତେ ଜାଣିଛେ ଶ୍ରୀଗଣେଶଙ୍କର ବାହନ ହେଉଛି ମୂଷା ଏବଂ ପ୍ରିୟ ଖାଦ୍ୟ ହେଉଛି ଲଡୁ । ମୂଷାର ରହିବା ଅର୍ଥ ସର୍ବବ୍ୟାପୀ । ଅର୍ଥାତ ଶ୍ରୀଗଣେଶଙ୍କ ଆଶୀର୍ବାଦ ସର୍ବବ୍ୟାପୀ ହୋଇଥାଏ । ଏଣୁ ପ୍ରତିମା କିଣିବାବେଳେ ମୂଷା ଓ ଲଡୁକୁ ଆପଣ ଯେମିତି ଭୁଲିନଯାଆନ୍ତି ।
ଏମିତି କିଛି କଥାକୁ ଧ୍ୟାନଦେଲେ ଆପଣଙ୍କ ଘର ସବୁବେଳେ ହସୁଥିବ ଆଉ ସୁଖଶାନ୍ତିରେ ଜୀବନ ବିତୁଥିବ । ପବିତ୍ର ଗଣେଶ ଚତୁର୍ଥୀର ଶୁଭେଚ୍ଛା ଜଣାଇ ଆପଙ୍କ ସମୃଦ୍ଧି କାମନା କରୁଛି ଓଡି ନେଷ୍ଟ ।
